GENSAN- Gisugdan na nga gipatuman ning adlawa ang Service Contracting Program nga dakong tabang sa riding public, mga member-operator, og mga stakeholder.
Sa pakighinabi sa Bombo Radyo Gensan, kini ang gipahibalo ni Orly Sabelita, Chairman sa Gensan Federation of Transport Cooperatives kung asa gibutyag sa nasampit nga ang programa ang suporta sa gobyerno taliwala sa krisis sa enerhiya sa nasod.
Matod niya, labing menos nakatabang kini sa mga drayber ug operator sa mga modernized jeepneys sa dakbayan. Ubos sa programa bayran sa gobyerno ang P40 kada kilometro sa biyahe, apan adunay limitasyon kini nga hangtod 100 kilometros.
Gawas niini, ginapatuman usab ang mga diskwento sa pamasahe kung asa adunay 20% nga bawas alang sa regular nga pasahero, samtang 40% ang diskwento alang sa mga persons with disabilities (PWDs), senior citizens, og mga estudyante.
Sa kasamtangan, anaa sa 20 yunit sa Eurofor mini buses og e-jeep sa ilang kooperatiba nga mibiyahe sa Route 5, samtang adunay dugang upat nga yunit sa e-jeep nga gabyahe sa Route 6 ang na-enroll sa maong programa.
Kada unit ang adunay nakapaskil nga tarpaulin og QR code aron mas dali ang pagbayad og pagpatuman sa ‘discounted fares’.
Dugang ni Sabelita, bisag wala pa hingpit nga nagbalik sa normal ang presyo sa krudo, dakong tabang ang programa aron mominus ang ilang pagkalugi.
