Giplano nang kasuhan sa aktres nga si Kim Chiu ang mga indibidwal ug online platforms nga nagpakaylap og mga bakak nga impormasyon batok kaniya.
Sa iyang social media account, gibutyag sa aktres nga gisusi na sa iyang legal team ang posibleng pagsang-at og kaso batok sa mga responsable.
Matud pa ni Chiu, usa sa iyang gikabalak-an ang pagpanghilabot sa iyang pribadong kinabuhi ug ang paggamit sa iyang ngalan sa pipila ka social media influencers aron makakwarta.
Gipasabot usab sa aktres nga mahimong magamit ang social media sa maayong paagi ug giawhag ang publiko nga mahimong responsable sa ilang mga gipatik ug gipakaylap online.
Dugang pa niya, dili angay nga ipahibalo sa publiko pinaagi sa social media ang tanang personal nga problema ug mga butang nga iyang giagian.
Kahinumdoman nga niaging mga bulan, gipasakaan ni Chiu og kaso ug gipapriso ang iyang kaugalingong igsoon tungod sa giingong pagwaldas niini sa kwarta sa iyang kompanya.
