GENSAN- Gisaway ni Atty. Rogelio Garcia ang pamaagi sa Kamara sa pag-susi sa impeachment complaint batok kang Vice President Sara Duterte, ug giingon niya nga morag usa kini ka “fishing expedition,” ilabi na sa pag-apil sa isyu sa giingong unexplained wealth.
Sumala pa sa abogado nga ang pagtan-aw sa mga bank transactions nga naglangkob pa gikan 2005 hangtod 2025 dili na angay kon ang basehan mao ang panahon sa iyang pagka-bise presidente nga nagsugod lamang niadtong 2022.
Gipunto niya nga ang impeachment proceedings unta mag-focus lang sa panahon nga anaa na siya sa posisyon, ug dili apil ang mga transaksyon sa mga tuig nga wala pa siya sa maong katungdanan.
Sumala pa kaniya, normal ra sa usa ka indibidwal ang daghang bank transactions sulod sa taas nga panahon, apan dili sakto nga tipunon kini nga walay klarong konteksto o detalye.
Gidugang niya nga ang isyu sa “unexplained wealth” kinahanglan maggikan lamang sa aktuwal nga panahon sa serbisyo sa opisyal, dili sa tibuok niyang “financial history”.
Alang kaniya, ang maong pamaagi sa imbestigasyon mahimong makahatag og sayop nga impresyon sa publiko ug makadaot sa patas nga proseso.
