GENSAN- Mireklamo ang pipila ka miyembro sa transport sector sa dakbayan sa Gensan tungod sa dugay nga pag-release ug kakulang sa fuel subsidy nga gisaad sa gobyerno.
Sumala kang Ester Buday, usa ka operator, hangtod karon wala pa nila madawat ang maong ayuda bisan pa man nga nakumpleto na nila ang mga kinahanglanon ug napasa na ang ilang aplikasyon.
Dugang pa niya nga pinaagi pa sa bangko ipadala ang subsidy apan wala pa’y klarong petsa kung kanus-a kini mahatag. Gibutyag usab niya nga bisan ang mga driver nga nag-apply na, wala gihapon makadawat sa maong benepisyo.
Matud pa, giingnan sila nga unahon ang mga operator, apan hangtod karon wala gihapon kini napatuman.
Samtang, giila ni Buday nga dako unta’g tabang ang subsidy, apan kulang ra gihapon ang P5,000 nga ayuda.
Iyang giingon nga ang maong kantidad mahimong igo lamang sa usa o duha ka adlaw nga gasto sa krudo, ilabi na sa mga biyahe sama sa ruta nga Kiamba padulong sa General Santos diin mokabat og P3,000 ang gasto sa diesel sa usa ka round trip.
Tungod niini, nanawagan siya sa gobyerno nga dili lang mosalig sa paghatag og subsidy, kundili maghatag usab og mas lig-on nga solusyon sama sa paghatag og dugang pang trabaho aron masiguro ang panginabuhi sa mga drayber ug ilang pamilya.
Sa kasamtangan, padayon ang pagtaas sa presyo sa produktong petrolyo nga maoy nagpadugang sa kabug-at sa kahimtang sa transport sector sa tibuok nasud.
