GENSAN- Nagpahayag og dakong kabalaka si Marfin Tan usa ka Fishing magnate sa kritikal nga kakulang sa suplay sa lana nga nakaapekto sa sektor sa panagat sa General Santos City, nga posibleng moresulta sa paghunong sa operasyon sa mga mananagat kung mahutdan og krudo ug gasolina.
Nanawagan siya sa gobyerno nga hatagan og espesyal nga alokasyon sa lana ang industriya aron masiguro ang padayon nga operasyon, imbes nga mosalig lamang sa limitado ug panandalian nga ayuda nga dili makasustiner sa ilang panginahanglan.
Matud niya, mas importante ang kasiguruhan sa suplay sa lana tungod kay kini ang nagpadagan sa mga barko ug nagbuhi sa tibuok industriya sa pangisda.
Gipasabot usab niya nga adunay mga kompanya nga napugos og pagkunhod sa ilang operasyon hangtod 30% tungod sa taas nga gasto sa lana ug kalisod sa pagpangita og isda, ilabi na kay ang modernong pamaagi sa panagat nagkinahanglan og daghang fuel.
Nanawagan siya og klaro ug konkretong plano gikan sa gobyerno ug mipadayag nga ilang ipadangat ang ilang kahimtang sa Senado pinaagi sa ilang pederasyon aron makapangita og dugayng solusyon sa krisis sa lana
