ALABEL, SARANGANI- Nanawagan si Fulung Romy Martin, presidente sa Sarangani IP Professionals Association, sa publiko nga mas lawom nga sabton ug respetuhon ang mga tradisyon ug kultura sa mga Indigenous Peoples o IP, human sa nagkalain-laing reaksiyon, komento ug diskriminasyon nga ilang nasinati.
Gipatin-aw ni Martin nga dili angay gamiton ang ritwal nga “Sulif” sa paghusay sa panagbangi bahin sa yuta.
Matod niya, ang Sulif usa ka tradisyonal nga pamaagi sa tribong Tagakaulo nga gigamit sa pagsulbad sa pipila ka matang sa kaso, sama sa pagpatay ug pagpangawat.
Dugang pa ni Martin nga dili unta mahitabo ang maong insidente tungod kay dili alang sa panagbangi sa yuta ang ritwal nga Sulif.
Gihimo niya kini nga pagpatin-aw human nalambigit ang maong ritwal sa insidente sa pagkamatay sa duha ka mag-uuma sa Glamang River, Datal Anggas, Sarangani Province.
Sa pagkakaron, wala pa maghimog konkretong lakang ang komunidad sa mga IP tungod kay gikinahanglan pa ang pagsusi sa maong insidente.
