Ginapanawagan sa Department of Energy (DOE) ug Department of Trade and Industry (DTI) nga ipatuman ang price cap sa liquefied petroleum gas (LPG).
Matod ni Sen. Sherwin Gatchalian, ang padayon nga pagsaka sa presyo sa LPG makapabug-at kaayo sa mga panimalay ug gagmay nga negosyo.
Gihangyo usab sa senador ang duha ka ahensya nga siguruhon ang igong suplay ug higpit nga pagbantay sa presyohan sa merkado aron dali nga maipatuman ang price ceiling kung kinahanglan.
Una nang gipatin-aw sa LPG Marketers Association sa publiko nga wala silay nakita nga kakulang sa suplay sa LPG sa umaabot nga mga bulan, apan nagpaabot sila og posibleng pagsaka sa presyo.
Sumala sa ilang updated data, gibanabana nga molungtad pa og 35 hangtod 45 ka adlaw ang suplay nga mas maayo kumpara sa miaging datos, ug gilauman usab nga moabot sa ₱1,400 hangtod ₱1,500 ang presyo sa kada tangke sa Abril.
Matod sa grupo, ang pagsaka sa presyo tungod sa mas mahal nga shipping costs tungod sa pag-usab sa ruta sa Middle East tungod sa gubat, nga karon moagi na sa United States, Africa, Canada, ug Australia.
