Mipadayag ang mga drayber sa dakbayan nga dili mag-usab ang ilang baruganan nga kinahanglan pataasan ang pamasahe, tungod sa padayon nga pagsaka sa inflation ug kakulang sa makita nilang pang-long-term nga solusyon sa krisis nga giatubang sa nasud.
Sumala ni Orly Sabelita, General Manager sa Metro Gensan Cooperative, kinahanglan gyud nga i-adjust ang pamasahe aron makatabang sa pagtabon sa nagkataas nga gasto sa operasyon, ilabi na sa kusog nga epekto sa inflation nga nag-apekto sa tanan sektor.
Giingon ni Sabelita nga dugay na nilang gipaningkamotan nga ipabati sa gobyerno ang ilang panawagan alang sa fare increase, tungod kay ang kasamtangang sitwasyon sa ekonomiya nagdala og dako nga hagit sa mga transport operators ug draybers.
Gipasiugda usab niya nga mas grabe ang kahimtang karon tungod sa padayon nga krisis sa presyo sa mga palaliton ug gasolina, nga direktang nakaapekto sa ilang kita ug operasyon.
Samtang nagpadayon ang ilang panawagan, naglaum ang sektor sa transportasyon nga matagad sa gobyerno ang ilang kahimtang ug makahatag og angay nga aksyon aron masustinar ang serbisyo sa publiko.
