GENSAN- Opisyal nga mibisita si PBGen Hansel Marantan, Director sa Philippine National Police – Highway Patrol Group (PNP-HPG) og mainiton nga giabi-abi niini ang tanan nga opisyales ug mga miyembro sa HPG sa rehiyon sa SOCCSKSARGEN sa HPG-12 Headquarters nga nahimutang sa Camp Fermin Lira sulod sa General Santos City Police Office sa General Santos City kagahapong adlawa Marso 8 ning kasamtangang tuig.
Atol sa maong pagbisita, personal nga nakigkita ug nakig-istorya ang opisyal sa mga personnel sa rehiyon aron mahibaluan ang kahimtang sa ilang operasyon ug mapalig-on pa ang koordinasyon sa mga kampanya sa HPG batok sa mga krimen nga may kalabutan sa sakyanan, ilabina ang carnapping ug uban pang paglapas sa balaod sa dalan.
Gipasiugda usab ni Marantan ang kahinungdanon sa disiplina, integridad, ug dedikasyon sa serbisyo sa matag miyembro sa HPG aron masiguro ang kaluwasan sa publiko ug ang maayong kahapsay sa trapiko sa mga kalsada sa rehiyon.
Samtang nagpadayon ang mga operasyon sa HPG sa tibuok nasod, gilauman nga magpadayon ang kooperasyon sa mga lokal nga pulisya ug komunidad aron mas mapalig-on ang kampanya sa gobyerno batok sa carnapping ug uban pang krimen nga nakaapekto sa mga motorista.
