GENSAN- Gi awhag ni Atty. Jong Gonzales, hepe sa Public Safety Office sa dakbayan sa Heneral Santos sa tanang mga tricycle operator nga gamiton ang nahibilin nga mga bulan sa moratorium aron maandam ang ilang mga yunit sa umaabot nga pagpa-standardize.
Sumala kaniya, mas maayong magsugod na og andam karon pa lang aron malikayan ang kalit nga pagdali sa trabaho ug ang posibleng dugang nga gastuhon sa higayon nga dungan nang ipatuman ang color coding scheme ug ang bag-ong gidak-on sa sidecar sa pagsugod sa tuig 2027.
Gipasabot ni Gonzales nga ang kasamtangang moratorium nga gitugot alang sa mga gagmay’ng tricycle epektibo na lamang hangtod sa Disyembre ning tuiga. Sa pagsugod sa Enero 1, 2027, kinahanglan nga ang tanang tricycle nga nagdagan sulod sa dakbayan nakasunod na sa gitakdang standard nga gidak-on sumala sa regulasyon sa siyudad.
Wala pa’y eksaktong petsa kon kanus-a ipatuman ang color coding scheme tungod kay naghulat pa ang buhatan sa pinal nga direktiba gikan sa mayor. Bisan pa niini, gipahimangno ni Gonzales nga posibleng ipatuman ang pagbag-o sa kolor sa mga yunit dungan sa pagpaangay sa gidak-on sa sidecar aron malikayan ang doble o balik-balik nga gasto sa mga operator._
Gipasabot usab sa opisyal nga ang maong lakang kabahin sa mas lapad nga programa sa dakbayan alang sa pagpalig-on sa kahapsay sa trapiko ug pagmintinar sa kaayohan sa publiko.
