GENSAN – Giklaro sa usa ka opisyal sa South Cotabato Electric Cooperative II o SOCOTECO II nga ang pagtaas sa bayronon sa kuryente nga gireklamo sa daghang konsyumer karon, kasagaran tungod sa pagsaka sa generation charges ug dili tungod sa kooperatiba.
Sumala ni Elinito Titing Senit, Board of Director sa SOCOTECO II, ang kooperatiba dili mao ang nagpatuman sa pagtaas sa presyo sa kuryente, kondili sila tigkolekta lamang sa bayad nga ipasa ngadto sa mga power generation companies.
Matud pa ni Senit, ang SOCOTECO II limitado ra ang papel sa distribution charges, samtang ang dakong bahin sa bayronon sa kuryente gikan sa generation ug transmission charges nga ginatakda sa mga power suppliers ug sa merkado sa kuryente.
Gipasabot usab sa opisyal nga ang kantidad nga ginakolekta sa SOCOTECO II dili tanan mapabilin sa kooperatiba, tungod kay kini direkta nilang ibayad sa mga kompanya nga nag-supply sa kuryente.
Busa, gihangyo ni Senit ang publiko nga masabtan ang tinuod nga sitwasyon ug likayan ang pagpasangil dayon sa SOCOTECO II, samtang padayon ang kooperatiba sa pagpangita og paagi aron mapahupay ang epekto sa pagtaas sa bayronon sa kuryente sa mga konsyumer
