GENSAN – Personal nga grudge ang usa sa gitutukan nga anggulo sa kapulisan isip posibleng motibo sa pagpamusil patay sa usa ka utility worker gawas sa usa ka bangko sa Polomolok, South Cotabato kagahapon.
Nagpadayon ang imbestigasyon sa Polomolok Municipal Police Station human sa insidente nga miresulta sa kamatayon sa biktima nga giila nga si Ginno Castro, 26 anyos, residente sa Barangay Aflek, T’boli, South Cotabato, ug nagtrabaho isip utility worker.
Gipusil ang biktima sa security guard sa bangko nga si Mark Anthony Manal, residente sa Barangay Sulit, Polomolok, diin nagpusil usab sa iyang kaugalingon ang nasampit human nga gipusil ang biktima.
Sumala sa pahayag ni Marian Del Seriano, asawa sa biktima, suod kaayo ang relasyon sa iyang bana ug sa suspek ug wala sila nagpakita og bisan unsang problema o panaglalis sa publiko.
Dugang pa niya, kaniadtong miaging Sabado, nag-uban pa si Castro ug Manal ug walay bisan unsang timailhan sa away o tensyon, hinungdan nga naglibog ang pamilya ug mga otoridad sa tinuod nga rason sa kalit nga insidente.
Sa pagkakaron, gitigom na sa mga otoridad ang tanang ebidensya lakip ang CCTV footage sa bangko, testimonya sa mga saksi, ug forensic reports aron masabtan ang tinuod nga hinungdan sa pagpamusil.
