Nakadawat ang Pilipinas og lima ka barkong panggubat gikan sa Japan.
Kabahin sa modernization deal sa Pilipinas ang desisyon sa Japan nga ibalhin ang lima ka Abukuma-class destroyer.
Nagpakita kini sa paningkamot sa Japan nga palig-onon ang maritime capabilities sa ilang mga kaalyadong nasud sa rehiyon.
Matod sa Japan, tukma ang maong lakang ilabi na karon nga nagkakusog ang agresibong lihok sa China sa pag-angkon sa mga teritoryo sa West Philippine Sea.
Alang sa Pilipinas, makatabang ang maong mga barkong panggubat sa pagpalig-on sa surface combat ug anti-submarine warfare capabilities, ilabi na sa West Philippine Sea.
Ang matag barko adunay Harpoon missiles, ASROC launchers, torpedoes ug Phalanx defense systems nga maghatag og dugang nga kapasidad gawas sa pagpahigayon og patrol operations.
Bisan pa nga nagkinahanglan og puhunan ang refurbishment, training ug integration, gilauman nga mas molawom ang kooperasyon tali sa Japan ug Pilipinas pinaagi sa maong pagbalhin sa mga barko.
