SOUTH COTABATO– Nagpadayon ang imbestigasyon sa kapulisan sa Polomolok Municipal Police Station human sa insidente sa pagpamusil gawas sa usa ka bangko kagahapong adlawa.
Giila ang biktima nga si Ginno Castro, 26 anyos, residente sa Barangay Aflek, T’boli, South Cotabato, ug nagtrabaho isip utility worker. Siya napusil-patay sa kamot sa usa ka security guard sa bangko nga si Mark Anthony Manal, residente sa Barangay Sulit, Polomolok, South Cotabato. Human sa pagpamusil kang Castro, mipusil usab si Manal sa iyang kaugalingon ug gilayon gidala sa balay tambalanan alang sa emergency treatment.
Sumala sa pahayag ni Marian Del Seriano, asawa sa biktima, suod kaayo ang relasyon sa biktima ug suspek, ug wala sila nagpakita ug bisan unsang problema sa publiko. Dugang pa, kaniadtong nakalabay nga Sabado, nag-uban pa si Manal ug Castro ug wala’y panaglalis o away, nga nagpangutana sa mga otoridad kung unsa may rason sa kalit nga insidente.
Sa pagkakaron, ang kapulisan nagpadayon sa pagpangita ug dugang detalye ug posibleng motibo sa pagpamusil, lakip na ang posibilidad sa personal nga tensyon, mental health issues, o dili pa masayran nga rason. Gisiguro sa mga otoridad nga tanang ebidensya gikan sa CCTV, testimonya sa mga saksi, ug forensic reports matigom aron mas masabtan ang hinungdan sa trahedya.
