GENSAN – Mikabat na sa 26 ang katibuk-ang kaso sa mga nasamdan tungod sa pabuto sa rehiyon dose gikan Disyembre 21 hangtod Disyembre 30, 2025 alas 8 sa buntag.
Base sa Fireworks-Related Injury Surveillance sa Department of Health Center for Health Development SOCCSKSARGEN, ang maong ihap mas ubos kumpara sa kaparehong panahon niadtong 2024 nga adunay 39 ka kaso, nga nagpasabot og 33 porsyentong pagkunhod sa fireworks-related injuries karong tuiga.
Usa lamang ka bag-ong kaso ang nadugang sa pinakabag-ong monitoring sa DOH.
Sa 26 ka kaso, tanan niini tungod sa direktang kadaot sa pabuto samtang walay natalang kaso sa fireworks ingestion ug stray bullet injury.
Sa matang sa kadaot, lima ang nag-antos og injury sa mata, baynte ang walay naputol nga parte sa lawas, usa ang may amputation ug usa usab ang natala nga adunay hearing loss.
Ang pinakabata nga edad sa biktima dos anyos samtang ang pinakatigulang anaa sa 78 anyos. Mas daghan ang lalaking nasamdan nga mikabat sa 24 ka kaso samtang duha lamang ang babaye.
Sa lugar diin nahitabo ang mga insidente, nanguna ang South Cotabato nga adunay 10 ka kaso, gisundan sa North Cotabato nga may walo, Sarangani ug Sultan Kudarat nga may tulo matag usa, ug duha ka kaso ang natala sa dakbayan sa General Santos City.
Samtang sa klase sa pabuto nga kasagarang nalambigit sa mga insidente, nanguna ang 5-Star nga adunay walo ka kaso, gisundan sa kwitis nga may lima, triangle nga may tulo ug sparkler nga may duha ka kaso.
Padayon ang panawagan sa DOH sa publiko nga magbantay ug likayan ang paggamit sa delikadong pabuto ilabi na karong nagkaduol na ang pagsaulog sa Bag-ong Tuig, aron malikayan ang dugang pang mga kadaot ug insidente.
