Niabot na sa 6 ang namatay sa aksidente sa bus sa Del Gallego, Camarines Sur, usa ka adlaw human sa Pasko.
Base sa inisyal nga datos nga gipagawas sa pulisya, 4 ang natala nga patay sa lugar sa aksidente ug karon nadugangan kini og 2 pa.
Sumala ni Police Captain Bernie Undecimo, hepe sa pulisya sa Del Gallego Municipal Station, usa ka biktima ang namatay niadtong Sabado ug ang usa sayo sa Domingo sa buntag sa Bicol Medical Center human nakaangkon og grabe nga mga samad sa iyang tibuok lawas tungod sa kusog nga impact sa bus.
Sa inisyal nga report nga gipagawas sa Pulisya, ang aksidente nahitabo mga alas 2 sa kaadlawon sa Barangay Magais, ang bus giingong gikan sa Quezon City ug padulong sa Sorsogon. Samtang nahulog kini sa gibanabanang 26 ngadto sa 30 metros nga giladmon, diin ang mga kahoy sa ubos sa bungtod diin kini nabangga nakatabang sa pagpugong niini sa pagkahulog sa ubos.
Sumala sa pulisya, ang drayber sa bus posible nga nakatulog ug nahulog sa pangpang.
Samtang, ang drayber nagpaayo karon sa ospital human nakaangkon og grabe nga mga samad. Gibantayan siya sa mga pulis tungod sa iyang daghang mga kaso. Samtang ang kompanya sa bus nagpadayon sa paghatag og tabang sa mga biktima.
