Naghain ang Commission on Audit (COA) ng apat pang fraud audit report sa Independent Commission for Infrastructure (ICI) may kaugnayan sa P297 milyong halaga ng maanomaliyang flood control projects sa Bulacan 1st District Engineering Office.
Sinabi ng COA na in-award ang mga proyekto sa government contractors na Wawao Builders at SYMS Construction & Trading na nakitaan ng seryoso at paulit-ulit na sinyales ng maling paggamit ng kaban ng bayan.
Kabilang sa na-flag na proyekto ay ang flood mitigation structures sa Barangay San Nicolas sa Hagonoy. Ibinigay ang naturang proyekto sa Wawao builders sa halagang mahigit P77 million.
Subalit, nadiskubre sa isinagawang inspeksiyon na walang mga istruktura sa lokasyon ng proyekto kahit pa ito ay na-label na 100% ng kompleto sa papel.
Sa Wawao Builders din in-award ang riverbank protection structure sa Barangay Iba, Hagonoy sa halagang P74 million na nadiskubreng sa iba lugar ipinatayo.
Ayon sa COA, maliban sa dating DPWH Bulacan engineers, kabilang sina Henry Alcantara, Brice Hernandez at Jaypee Mendoza, inilista din ng komisyon sa mga personalidad na may pananagutan sa maanomaliyang proyekto sina Engrs. Ernesto Galang, Paul Jayson Duya, Jolo Mari Tayao, Mark Lester Castro, John Michael Ramos at Rafaelito Marcelo, gayundin sina Wawao Builders’ General Manager Mark Arevalo at SYMS Construction and Trading’s Sally Santos
Ipinadala naman ng komisyon ang naturang reports at rekomendasyon sa Office of the Ombudsman na nagsasagawa ng preliminary investigation para matukoy kung magsasampa ng mga kaso sa korte.
