Gibarugan ni National Bureau of Investigation o NBI Director Atty. Melvin Matibag ang gihimong imbestigasyon sa ahensya kalabot sa mga kabtangan nga gideklarar ni Vice President Sara Duterte sa iyang Statement of Assets, Liabilities and Net Worth o SALN.
Sa press briefing karong adlawa, gipakita pag-usab ni Matibag sa publiko ang mga dokumento kalabot sa mga yuta o kabtangan nga giimbestigahan ug gilambigit sa pamilya Duterte.
Dugang pa ni NBI Director Matibag nga adunay klarong mga ebidensya ug dokumentong nakalap ang ahensya nga, matod pa, mosuporta sa alegasyon sa ‘misdeclaration’ o sayop nga deklarasyon sa SALN sa ikaduhang pangulo.
Gipasabot usab niya nga dili lamang kini mga hungihong kay adunay mga kalainan tali sa gideklara nga kantidad sa mga kabtangan ni Vice President Sara Duterte ug sa iyang bana nga si Atty. Manases Carpio, kon itandi sa aktuwal nga ‘assessed value’ o gibanabanang bili sa mga yuta.
Matod ni Matibag, pirmado ang mga dokumento nga nagpakita sa gipasangil nga pagpanag-iya sa magtiayon, nga iyang giingong gilimod lamang sa ikaduhang pangulo.
Gawas sa maong mga kabtangan, gipakita usab sa direktor ang ubang mga property nga gituohang gipanag-iya usab sa bise presidente o sa pamilya Duterte.
Miingon si Matibag nga kompyansa siya sa mga nakaplagang kabtangan nga may kalabotan sa bise presidente tungod kay kini mismo ang mga kabtangan nga iyang gideklara base sa pinakabag-ong SALN nga iyang gisumite.
Tungod niini, nangutana ang direktor kang Vice President Sara Duterte kon nganong nakalista man sa iyang SALN ang maong mga kabtangan kon iyang gilimod ang pagpanag-iya niini.
