Gikumpirma sa Office of the Ombudsman nga nadawat na nila ang referral gikan sa National Bureau of Investigation bahin sa imbestigasyon niini sa Statement of Assets, Liabilities and Net Worth o SALN ni Bise Presidente Sara Duterte.
Sumala sa Ombudsman, ang referral ug ang mga dokumento nga gilakip niini ipaubos sa inisyal nga ebalwasyon aron mahibal-an ang angay nga aksyon nga himuon.
Naglakip kini sa pagpahigayon og dugang nga mga imbestigasyon kung gikinahanglan subay sa mga probisyon sa balaod.
Makasalig ang publiko nga ilang atimanon ang butang nga walay gidapigan ug walay politikal nga pagpihig.
Mahinumduman nga ang referral nga gisumite sa NBI ngadto sa Ombudsman naggikan sa pagkadiskobre sa mga kalainan sa mga kabtangan nga gideklara sa SALN ni Bise Presidente Duterte.
Busa human sa imbestigasyon sa bureau, ilang gipasa kini sa Tanodbayan sa dihang nakita nila ang kalainan sa gideklara nga kantidad sa mga kabtangan kon itandi sa ilang tinuod nga gi-assess nga kantidad.
