539 ka mga paryente sa giingong mga biktima sa extra judicial killings ubos sa administrasyong Duterte ang mahimong kabahin sa nagpadayon nga husay sa International Criminal Court.
Ang ubang partisipasyon nagtumong sa pagpakita kon giunsa pagsagubang sa mga pamilyang namatyan ang ilang pagbangotan, kakabus, nabalda nga edukasyon ug bisan ang kahadlok, sumala sa usa ka trial brief nga gisumite sa ilang common legal representative niadtong Oktubre 13 ngadto sa ICC.
Ang 108 ka mga panid naghulagway usab kon giunsa pagsagubang sa mga pamilyang namatyan ang sikolohikal nga kalisud ug kalisud sa pinansyal human ang ilang mga paryente gipatay sa EJK ubos sa administrasyong Duterte.
Sa 539 ka mga partisipante, 143 o 27 porsyento mga bata sa dihang miulbo ang gubat sa droga, samtang 89 o 17 porsyento karon mga bata pa.
Sa rekord, 57 ka mga bata ang mihunong sa pagtuon sulod sa halos usa ka tuig human gipatay ang ilang mga miyembro sa pamilya.
Mga 190 sa mga gipatay o gisulayan nga patyon ang mga nagbuhi sa ilang pamilya sumala sa mga representante.
Samtang ang uban kanila nagkita lang og P100 kada adlaw, sa wala pa sila gipatay.
Gisulti usab sa report ang mga epekto sa sikolohikal nga gitaho sa mga biktima nga miapil.
Ang tanang 539 ka biktima nag-ingon nga sila nakasinati og kadaot sa sikolohikal, lakip ang grabeng kasubo, kabalaka, kasuko, kahadlok, kawalay paglaum, ug sosyal nga pag-inusara.
Gihulagway usab sa representante ang epekto niini sa mga bata nga nakasaksi sa kapintasan, ang uban kanila gi-bully ug nakasinati og kaulaw tungod sa ilang pakig-uban sa usa ka miyembro sa pamilya nga giingong nalambigit sa ilegal nga droga.
Giingon usab sa representante nga gibanabana nga 122 ka mga bata ang namatay sa kampanya batok sa droga tali sa Hulyo 2026 ug Disyembre 2019, sumala sa usa ka report.
