GENSAN – Usa ka panday ang nakaplagan nga patay ug gilubong sa kilid sa iyang gi-trabahoan sa Green Fields Subdivision, Purok 24, Barangay Lagao, pasado alas-9 sa buntag November 21 2025.
Sumala sa report nga nakuha sa Bombo Radyo Gensan, nakabantay ang mga residente og dili normal nga baho ug nakakita og bukog sa lugar. Dali dayong mitubag ang Lagao Police Station ug ila dayong gi-secure ang palibot aron masiguro ang kaluwasan sa mga silingan.
Pag-abot sa SOCO Team, ilang gi-inspeksyon ang lawas sa biktima ug nakit-an ang itom nga jersey nga adunay apelyido nga Pansa.
Nakumpirma sa mga kauban sa trabaho nga kini mao si John Mark Pansa, hamtong, usa ka panday nga taga-Kidapawan, North Cotabato, nga temporaryong nagpuyo sa lugar sa ilang trabaho.
Sumala sa mga silingan, si Pansa usa ka hilumon ug buotan nga tawo, ug ang pagkamatay niya nakapahinganghang sa komunidad. Nagpasidaan ang kapulisan sa publiko nga mag-amping ug motabang sa imbestigasyon pinaagi sa paghatag og impormasyon kung adunay nakakita o nakahibalo sa mga kahimtang sa palibot sa insidente.
Padayon karon ang pagpangita sa responsable ug ang pagtipon sa ebidensya aron madala sa hustisya ang nakahimo sa maong krimen. Ang Lagao Police Station nangayo usab sa kooperasyon sa katawhan aron masiguro nga mapadali ang imbestigasyon ug hatagan ug hustisya ang biktima
