GENSAN – Opisyal nang gibuksan ang Batang Pinoy 2025 kagahapong adlawa sa dakbayan sa General Santos, nga nagtimaan sa makasaysayanong pagsugod sa pinakadakong national sports event alang sa kabatan-onan.
Gitambungan kini sa pipila ka mga mayor gikan sa nagkalain-laing lungsod sa nasud, uban sa ilang mainitong pagsuporta sa paglambo sa kabatan-onang atleta.
Mainiton usab nga giabi-abi ni Gensan City Mayor Lorelie Geronimo-Pacquiao ang tanang delegado ug partisipante, ug gipadayag ang iyang kalipay nga ang Gensan mao ang napiling host city sa maong prestihiyosong kompetisyon.
Usa sa mga gipanghinam-an sa seremonya mao ang makalingaw nga confetti drop gikan sa helicopter nga midugang kalipay sa selebrasyon.
Naghatag usab ug keynote address si DILG Secretary Juanito Victor Remulla, diin iyang gipasiugda ang importansya sa panaghiusa, disiplina, ug kalig-on pinaagi sa isports.
Gipangulohan usab ni Manny Pacquiao ug Hidilyn Diaz ang Torch Relay ug Cauldron Lighting, nga nagsimbolo sa paglaum ug inspirasyon alang sa tanang atleta nga nakigkompetensya.
Nagtapos ang kalihukan sa usa ka mabungahong fireworks display nga nagpasiugda sa kalipay, panaghiusa, ug espiritu sa kabatan-onan sa Gensan.
