Mukabat 70 ka senior citizens gikan sa Lake Sebu, South Cotabato ug General Santos City ang makadawat ug cash gift ubos sa Expanded Centenarians Act karong Sabado, Setyembre 13.
Ang kalihukan pagadumalaon sa National Commission of Senior Citizens (NCSC) Region XII, uban sa Office of the President ug mga lokal nga panggamhanan sa Lake Sebu ug General Santos City.
Matod ni Commissioner Edwin Espejo, ang programa mao ang pagtuman sa Republic Act No. 11982 o Expanded Centenarians Act, diin ang mga senior citizen nga makaabot sa edad 80, 85, 90 ug 95 makadawat ug ₱10,000, ug ₱100,000 alang sa mga centenarian.
Upat (4) sa mga benepisyaryo gikan sa lumad nga komunidad sa Lake Sebu, samtang 66 ang gikan sa General Santos City.
Sugdan ang distribusyon alas-8 sa buntag sa Lake Sebu ug padayon alas-10 sa buntag sa Robinsons Place, General Santos City.
Kasabay niini ang usa ka Caravan of Services, diin lahi-lahi nga ahensya sa gobyerno ug pribadong sektor maghatag ug libreng medikal, sosyal ug uban pang serbisyo para sa mga senior citizens.
Gipasiugda ni Regional Director Dr. Rochelle Gajete-Oco nga ang mga tigulang kinahanglan mobati nga gihatagan sila ug bili ug giatiman sa gobyerno.
Base sa rekord hangtod Hulyo 31, 2025, adunay na 3,068 ka octogenarians, nonagenarians ug centenarians sa Region XII nga nakadawat sa programa, nga nagkantidad og kapin sa ₱31 milyon.
Ang special cash gift distribution, nga ipatuman sa tibuok nasud, mahitabo usab inubanan sa pagselebrar sa adlawng natawhan ni Presidente Ferdinand “Bongbong” Marcos Jr.(NCSC XII)
