Nakadawat og 50 milyones pesos nga pinansyal nga tabang gikan sa nasyonal nga panggamhanan ang LGU Malapatan alang sa rehabilitasyon ug pagbangon sa lungsod human sa mga kalamidad, ilabina sa epekto sa linog.
Personal nga gidawat ni Mayor Salway “Jun” Sumbo Jr. ang maong pondo atol sa seremonyas sa Malacañang Palace kagahapon Nobyembre 5.
Gikan ang pondo sa Disaster Rehabilitation and Recovery Assistance o DRRA Program ubos sa National Disaster Risk Reduction and Management Fund.
Lakip ang Malapatan sa 306 ka lokal nga panggamhanan sa tibuok nasud nga nakadawat og pinansyal nga tabang pinaagi sa maong programa alang sa mga lugar nga naapektuhan sa kalamidad gikan sa 2024 hangtod 2026.
Gamiton ang pondo sa rehabilitasyon ug pagpasig-uli sa mga imprastraktura, ingon man sa mga proyekto ug programa nga direktang makabenepisyo sa mga residente.
Gipasalamatan usab sa LGU Malapatan ang nasyonal nga panggamhanan ug gipasalig nga mangita pa og dugang nga suporta aron mapadali ang hingpit nga pagbangon sa lungsod gikan sa epekto sa linog.
