Mokabat sa ₱99.9 milyong pondo ang gigahin sa Department of Education (DepEd) alang sa pag-ayo ug rekonstruksiyon sa 11 ka pampublikong eskwelahan sa General Santos City nga nadaot sa kusog nga linog.
Gikan ang pondo sa 2026 Quick Response Fund (QRF) nga gamiton sa pag-ayo ug pagtukod pag-usab sa 34 ka classroom.
Lakip sa mga makadawat sa pondo ang Lagao Central Elementary School, A. Biscayda Elementary School, Pedro Acharon Sr. Central Elementary School ug Datu B. Balunto National High School, uban pa.
Usa sa mga gitakdang proyekto ang pag-ayo sa unom ka classroom sa Lagao Central Elementary School.
Sumala ni Mayor Lorelie Geronimo Pacquiao, makatabang ang maong pondo sa pagpasig-uli sa mga pasilidad ug pagsiguro nga luwas ang mga estudyante ug magtutudlo sa pagbalik sa ilang naandang kalihokan sa eskwelahan.
