Dungan nang madawat sa mga kwalipikadong kawani sa gobyerno ang ilang year-end bonus ug P5,000 nga cash gift kauban sa ilang unang sweldo karong Nobyembre.
Sumala sa Department of Budget and Management (DBM), nakapagawas na kini og ₱82.998 bilyong pondo alang sa maong mga benepisyo sa mga kwalipikadong sibilyan, militar ug uniformed personnel.
Ang year-end bonus katumbas sa usa ka bulan nga basic salary, base sa sweldo hangtod Oktubre 31, 2026.
Aron makadawat sa tibuok benepisyo, kinahanglan nakaserbisyo og labing menos 120 ka adlaw gikan Enero 1 hangtod Oktubre 31 ug anaa pa sa serbisyo sa gobyerno sa maong petsa.
Matud sa DBM, magdepende sa payroll schedule sa matag ahensya ang aktuwal nga petsa sa pagdawat, apan kinahanglan dungan nga ihatag ang bonus ug cash gift sa unang sweldo sa Nobyembre.
