Andam ang prosecution panel sa Kamara nga usisahon sila Vice President Sara Duterte ug ang iyang bana nga si Atty. Manases “Mans” Carpio kung ipatawag sila sa depensa isip mga testigo sa impeachment trial.
Sumala kang prosecution spokesperson Atty. Jay Tolosa, gusto nilang maklaro ang mga transaksiyong pinansyal ug mga kabtangan nga nalambigit sa alegasyon sa dili maipatin-aw nga kadato sa Bise Presidente.
Lakip sa ilang gustong ipatin-aw kang Duterte ang kalainan sa P98 milyones nga iyang gideklarang yaman sa SALN ug sa dugang nga P100 milyones nga nakita kuno sa mga rekord sa transaksiyon.
Samtang si Carpio, gusto usab nilang usisahon kalabot sa iyang 47.5 porsiyentong pagpanag-iya sa Calle 88 nga nakadawat kuno og P319.3 milyones nga remittance gikan sa China bisan duha lamang ang empleyado niini.
Gipasiugda ni Tolosa nga ebidensya, ug dili ang kasikatan sa mga nalambigit, ang angay nga basihan sa paghusay sa kaso.
Magpadayon ang impeachment trial karong Nobyembre 9 diin sugdan sa depensa ang pagpresentar sa ilang mga testigo ug ebidensya.
