Hugot nga gibantayan sa barko sa Philippine Coast Guard (PCG) nga BRP Teresa Magbanua ang mga lihok sa mga barkong iggugubat ug mga coast guard sa China nga nasigpatan 69.31 nautical miles sa Cabra Island sa Occidental Mindoro.
Gikompirma ni Philippine Coast Guard (PCG) spokesperson for the West Philippine Sea (WPS) Commodore Jay Tarriela nga mipahigayon og ronda ang BRP Teresa Magbanua sa maong dapit ug niluwat og radio challenge ngadto sa People’s Liberation Army (PLA) Navy warship 793 aron ipahibalo ang ilang tuyo sa maong lugar apan walay tubag gikan sa Chinese warship.
Apan ang escort niini nga China Coast Guard 4203, nitubag ug mi-insister sa soberanya ug hurisdiksyon sa China sa maong mga kadagatan. Kagahapon alas 11:00 sa buntag, padayon nagpahigayon ug shadowing ang BRP Teresa sa mga barko sa People’s Liberation Army Navy ug China Coast Guard nga giubanan sa laing barkong iggugubat, ang PLA Navy warship 164.
Tungod sa mga lihok sa maong mga barko sa China, ang mga tripulante sa BRP Teresa nipagawas og sunodsunod nga radio challenges apan walay tubag gikan sa mga barkong iggugubat sa China.
Gihingusgan sa PCG nga ang mga barko sa China nagpahigayon og mga operasyon sulod sa exclusive economic zone (EEZ) sa Pilipinas ug gipahinumdoman sila nga respetuhon ang hurisdiksyon sa nasud, pagtubag sa mga komunikasyon sa radyo ug paghunong sa paghimo og dili awtorisadong pagpatrolya o bisan unsang kalihokan sa exclusive economic zone sa Pilipinas.
Samtang, ang PLA Navy warship 164 naobserbahan nga nagpahigayon og helicopter landing exercises sa flight deck niini dungan sa padayon nga mga kalihokan nga natala sa PCG.
Ang presensya sa mga barko sa kadagatan sa Pilipinas nag-abot taliwala sa pagsaulog sa nasud sa ikasiyam nga anibersaryo kagahapong adlawa, Hulyo 12, sa kadaugan niini sa 2016 arbitral ruling nga nag-invalidate sa halapad nga pag-angkon sa China sa WPS.
