Posibleng mahuman karong Nobyembre ang impeachment trial ni Vice President Sara Duterte kung makompleto sa defense panel ang ilang presentasyon sa kaso sulod sa 10 ka tibuok adlaw sa pagtaral.
Matod ni lead House prosecutor ug Batangas 2nd District Representative Gerville Luistro, gilauman sa prosecution nga mangayo ang depensa og 10 ka full trial days aron ipresentar ang ilang mga ebidensiya kalabot sa nahibiling impeachment article nga may kalabotan sa alegasyon sa unexplained wealth batok kang Duterte.
Tulo sa upat ka orihinal nga impeachment articles ang una nang gibasura sa prosecution lakip niini ang mga alegasyon bahin sa grave threats batok kang Pangulong Ferdinand Marcos Jr., giingong sayop nga paggamit sa confidential funds, ug bribery sa Department of Education.
Matod ni Luistro, kaniadto nangayo ang depensa og 30 ka full trial days alang sa upat ka impeachment articles, busa, gibanabana nga mahimong magkinahanglan kini og 10 ka adlaw alang sa nahibiling isyu.
Apan mahimo gihapon nga moabot sa Disyembre ang pagtaral kung manginahanglan pa og dugang nga panahon ang defense panel.
Kinahanglan usab nga tun-an pag-ayo sa mga senador nga nagsilbing huwes ang kinatibuk-ang mga rekord ug ebidensiya sa hearing sa dili pa sila magpagawas sa ilang desisyon.
Naglaum usab si Luistro nga mahuman ang impeachment proceedings sa dili pa ang Pasko.
Gikatakdang ipadayon sa Senate impeachment court ang pagdungog sa Nobyembre 9, alas-10 sa buntag.
Aduna usab mga full-day proceedings nga gitakda sa Nobyembre 10, 12, 13, 19 ug 20, samtang mas mubo nga mga sesyon ang himoon sa Nobyembre 9, 11 ug 23.
