Gipaspasan sa National Food Authority o NFA ang proseso sa pagtipid sa mga palay pinaagi sa pag-gamit sa one-ton bags isip puli sa naandan nga 50-kilogram nga mga sako.
Gisugdan ang pilot testing niining bag-ong sistema niadtong Oktubre 2025 sa mga opisina sa Nueva Ecija, Occidental Mindoro ug Davao del Sur.
Matod ni NFA Administrator Larry R. Lacson, mikunhod og 75 porsyento ang oras nga gigahin sa trabaho samtang natunga usab ang gasto sa pagtipid gamit ang tonner bags ug forklift.
Gipasabot ni Agriculture Secretary Francisco P. Tiu Laurel Jr. nga ang pagtipid sa pondo magamit aron madugangan pa ang pagpalit sa NFA og palay gikan sa mga lokal nga mag-uuma.
Apan sumala sa NFA, kinahanglan pa nilang ayuhon ang mga lagda sa pest control ug fumigation sa dili pa ipatuman sa kinatibuk-an ang maong sistema.
