Giawhag ni Senador Jinggoy Estrada ang Department of Foreign Affairs (DFA) nga magpaklaro si Chinese Ambassador Huang Xilian kalabot sa mga silot nga gipahamtang sa kagamhanan sa China batok kang kanhi Senador Francis Tolentino.
Kini kalabot sa mga silot nga gipahamtang sa China sa kanhi senador nga nagdili kang Tolentino sa pagtunob sa Mainland China, Hong Kong ug Macao tungod sa mga pamahayag ug aksyon batok sa nasangpit nga nasod.
Si Estrada niinsistir nga walay dautan sa gihimo ni Tolentino ug gibase kini sa demokratikong proseso ug legal frameworks sa balaod.
Ang gipasabot sa senador mao ang duha ka landmark measures nga gimugna ni Tolentino nga gisuportahan ug gipasa sa Kongreso, nga mao ang Philippine Maritime Zones Act ug ang Philippine Archipelagic Sea Lanes Act.
Matod niya nga bisan pa sa Arbitral ruling nga mipabor sa katungod sa Pilipinas sa West Philippine Sea, ang China nagpadayon sa pagdaogdaog, pagpanghasi ug pagbutang sa peligro sa mga maritime scientist ug mananagat.
Dugang pa sa senador nga bisag prerogative sa China ang aksyon batok kang Tolentino, klaro gihapon nga nakadaot kini sa pagrespeto ug kalig-on sa usag-usa sa rehiyon.
