Gihagit ni Atty. Carlos Zarate, Human Rights Lawyer ang administrasyon ni Presidente Ferdinand Marcos Jr. ug ang mga may kalabutan nga ahensya sa gobyerno nga imbestigahan dayon ang pagpatay kang Ali Macalintal, aron matino o matugkan ang tinuod ug matagaan og hustisya ang pagkamatay niini.
Sumala ni Atty. Zarate, personal niya kining kaila si Macalintal tungod kaniadto kini nagsilbi nga Deputy Secretary General sa Karapatan-SOCKSARGEN, ug paralegal sa Union of People’s Lawyers in Mindanao (UPLM).
Ilang kauban si Macalintal sa pagtabang sa mga kaso batok sa mga human rights defenders, mga political prisoners, ug mga marginalized sectors hangtod sa tuig 2019.
Human sa iyang serbisyo isip paralegal, misulod si Macalintal sa media ug nanginabuhi isip mamamahayag sa usa ka lokal nga estasyon sa radyo dinhi sa dakbayan sa General Santos.
Gipasabot ni Atty. Zarate nga si Macalintal usa ka buotan, matinabangon, ug kasaligan nga tawo nga wala magdaot sa uban.
Tungod niini, nagdahum siya nga dili kini angay pasagdan ug kinahanglan kini hatagan og tukmang hustisya.
