Gikumpirmar ni Atty. Salvador Paolo Panelo Jr., tigpamaba ni Vice President Sara Duterte, nga luwas nga na-recover ang duha ka kanhi household staff sa Bise Presidente pinaagi sa tabang sa iyang legal team ug kapulisan kagahapon, Nobyembre 17, 2026.
Base sa asoy sa duha ka kanhi personnel nga gipagawas ni Panelo karong Miyerkules, Nobyembre 18, giingong gi-recruit sila sa usa ka pribadong indibidwal niadtong Oktubre 2026 aron manarbaho sa usa ka resort sa Boracay apan gidala sa Manila sa rason nga ipaubos sila sa training.
Niadtong Nobiyembre 16, ang ilang amo giingong nitug-an kanila nga dunay hulga sa ilang kinabuhi ug bisan sa iyang kinabuhi tungod sa pagtago kanila, samtang miinsister nga mawala lang ang hulga kon mopirma sila sa giandam nga affidavits nga giingong adunay mga bakak nga pasangil batok kang Duterte.
Gikatahong nagdumili ang duha sa pagpirma sa mga dokumento nga gihisgotan; bisan pa man giklaro niini nga wala sila gihimo nga mga binilanggo, nagpabilin sila ubos sa kontrol sa ilang amo tungod sa kahadlok, hangtod nga nangayo sila og tabang gikan sa Bise Presidente.
Usa ka legal nga grupo ug ang kapulisan ang daling mikuha sa duha kagahapon ug gidala sila sa estasyon sa pulis aron mohatag og sinumpaang pamahayag ug ipatala ang insidente sa police blotter.
— ADVERTISEMENT —
Matod sa kampo sa Bise Presidente, napugngan ang giingong plano nga gamiton ang duha alang sa paghatag og bakak nga testimonya; hinuon, nagdumili sila sa paghatag og dugang detalye sa pagkakaron aron masiguro ang kaluwasan sa mga nalambigit.











