Gibutyag sa legal counsel sa mga biktima sa giingong extra judicial killings (EJK) ubos sa war on drugs nga gisupak sa mga piskal sa International Criminal Court (ICC) ang hangyo ni kanhi Presidente Rodrigo Duterte alang sa interim release kay giusab sa defense team ang nasud diin dad-on ang kanhi presidente.
Si Atty. Gilbert Andres mikompirma nga ang mga piskal unang nakighisgot sa mga abogado sa kanhi Presidente sa nasud nga sakop sa ICC nga modawat sa kanhi Presidente kon ang iyang temporaryong kagawasan itugot.
Bisan pa sa aplikasyon sa kampo sa kanhi Presidente, lahi nga nasud ang nakabutang. Matod niya nga dili makauyon daan ang prosekusyon sa kasabotan hangtod nga dili nila kini mabasa.
Gipasabot usab ni Atty. Andres nga gisupak sa mga prosecutors ang interim release sa kanhi Presidente ngadto sa gisugyot nga host country tungod kay dugay kaayo ug komplikado ang pag-atubang sa kanhi Presidente sa korte tungod sa gilay-on sa maong nasud gikan sa The Netherlands, dugang pa sa pipila ka mga basehan nga gitumbok sa prosekusyon aron supakon ang interim release sa kanhi Presidente.
Samtang, matod niya gikatakdang moduso og mosyon ang habig sa mga biktima sa EJK aron supakon ang interim release sa kanhi Presidente. Matod niya ang ICC gipaabot nga mopagawas og desisyon sa kataposang semana sa Agosto o unang semana sa Septiyembre.
