Andam na ang Department of Transportation (DOTr) ug Land Transportation Franchising and Regulatory Board (LTFRB) sa paghatag og fuel subsidy para sa mga drayber ug operator sa pampublikong transportasyon.
Matud ni Transportation Secretary Vince Dizon, dili kinahanglan nga miyembro sa consolidated group ang usa ka benepisyaryo aron makadawat sa maong ayuda.
Gipasabot ni Dizon nga ang tumong sa gobyerno mao ang paghatag og inklusibong tabang tungod kay ang tanang sektor sa transportasyon apektado sa padayong pagsaka sa presyo sa lana—bisan pa man miyembro ba o dili sa consolidated group.
Sa pagkakaron, nagtinabangay na ang DOTr ug LTFRB uban sa ubang ahensya sa gobyerno sama sa Department of Energy (DOE), Department of the Interior and Local Government (DILG), Department of Information and Communications Technology (DICT), ug LandBank of the Philippines (LBP) aron mapaspasan ang proseso sa pag-apod-apod sa maong ayuda.
Sumala sa direktiba sa Malacañang, kinahanglan nga ipanghatag dayon ang subsidy ug gilauman nga mapatuman kini sa labing dali nga panahon.
