Naglaum ang House prosecution team nga mahuman sa labing madali nga panahon ang impeachment trial ni Vice President Sara Duterte, ug posibleng mahuman kini sa dili pa moabot ang Pasko ug Bag-ong Tuig.
Matod ni kanhi Rep. Ace Barbers, tigpamaba sa House prosecution team, posibleng mahuman sulod sa 12 ka adlaw ang presentasyon sa ebidensiya sa depensa kung magpresentar kini og duha ka testigo matag adlaw gikan sa 24 ka saksi nga gisumite niini alang sa Article II sa impeachment complaint.
Tungod niini, nagtuo si Barbers nga posibleng mahuman ang presentasyon sa mga ebidensiya sa dili pa ang holiday season.
Gipasiugda usab ni Barbers nga gitahod sa prosekusyon ang katungod ni Duterte sa due process o patas nga proseso, subay sa gitakda sa Konstitusyon.
Apan matod niini, kung mahatagan na og igong kahigayonan ang depensa nga tubagon ang mga ebidensiya sa prosekusyon, wala na’y rason nga dugayon pa ang proseso.
Gipaambit usab ni Barbers nga pareho sila og panan-aw ni presiding officer Chiz Escudero nga naglaum usab nga mahuman ang impeachment trial sa dili pa ang Pasko ug Bag-ong Tuig.
