Gipahimangnoan ni Senate impeachment court Presiding Officer Francis “Chiz” Escudero ang mga testigo sa impeachment trial nga mahimong ma-cite in contempt ug makaatubang og kaso nga perjury kung mamakak atol sa ilang paghatag og testimonya ilalom sa pagpanumpa.
Gihimo ni Escudero ang pahimangno atol sa ika-41 nga adlaw sa impeachment trial ni Vice President Sara Duterte kagahapon, Nobyembre 10, human nangutana si Senator-Judge Vicente “Tito” Sotto III bahin sa mga silot nga mahimong ipahamtang sa mga testigong mamakak atubangan sa impeachment court.
Matod ni Escudero, mahimong silotan sa korte ang mga testigong mamakak ug mahimo usab silang kasuhan og perjury sa tukmang opisina sa piskalya o korte tungod kay ang ilang mga pahayag gihatag ilalom sa pagpanumpa.
Gihimo ang pahimangno human gisaway sa pipila ka senador ang pamatasan sa unang testigo sa depensa nga si Davao City Assessor Engineer Jaime Adalin, tungod sa iyang pagngisi ug pagkatawa samtang gipangutana atol sa miaging hearing.
