Duha kahigayon nga magpatuman og pagtaas sa presyo sa mga produktong petrolyo ang mga kompaniya sa lana karong kataposan nga semana sa Hunyo.
Kini resulta sa pagsugot sa mga kompaniya sa lana nga hinay-hinayon nga ipatuman ang big-time oil price hike sugod karong adlaw sa Martes, Hunyo 24.
Kini tungod sa mga negosasyon tali sa mga opisyal sa Department of Energy (DOE) ug mga representante sa mga kompaniya sa lana nga positibo nga mitubag sa hangyo sa gobyerno.
Sugod karong adlawa, alas sais sa buntag, ang tulo ka dagkong kompaniya sa lana sama sa Shell, Petron, ug Seaoil mipatuman og umento nga ₱2.60/L sa diesel, ₱1.75/L sa gasolina, ug ₱2.40/L sa kerosene.
Sa Huwebes, Hunyo 26, parehas nga umento sa mga produkto sa petrolyo ang ipatuman.
Ang laing kompaniya sa lana sama sa Caltex nagpatuman usab karong adlawa og umento nga ₱3.45/L sa diesel, ₱2.25/L sa gasolina, ug ₱3.20/L sa kerosene.
Sa Biyernes, Hunyo 27, magpatuman kini nga kompaniya og dugang nga umento nga ₱1.50/L sa diesel, ₱1.00/L sa gasolina, ug ₱1.40/L sa kerosene. Sumala sa DOE, gisumite sa mga kompaniya sa lana ang ilang implementation scheme apil ang breakdown sa staggered adjustments kagahapon.
Gihimo kini nga lakang tungod sa kahadlok nga adunay kakulangan sa global nga suplay sa lana tungod sa nagkagrabeng panagbangi tali sa Israel ug Iran, diin naapil na usab ang Amerika.
Andam na usab ang gobyerno sa paghatag og ‘fuel subsidy’ para sa mga apektado nga operators ug drivers sa ‘public transportation’ tungod sa gipaabot nga pagsaka sa presyo sa global nga suplay sa lana tungod sa panagbangi sa Middle East.
