GENSAN- Personal grudge ang motibo nga ginataw-aw sa pamilya sa pagpamusil patay sa usa ka traysikol drayber sa Purok Malinawon, Barangay Conel, ning dakbayan sa GenSan kagabie.
Kahinumdoman nga ang biktima giila nga si Jeffrey Sasing, 46 anyos nga residente sa nahisgutang lugar.
Sa pakighinabi sa Bombo Radyo, gibutyag ni Carlito Sasing, amahan sa biktima, walay criminal record ang anak niya ug nagdako sa Malita, Davao Occidental.
Apan dako ang duda niya nga personal nga rason ang motibo sa krimen, tungod kay gi-agtang pagpusil ang anak niya sa makadaghang higayon nga hinungdan sa kamatayon.
Sa wala pa ang insidente, nilakaw matod pa kini aron mamasahero og gani gipangutana pa siya sa anak kung asa kini paingon.
Sumala sa mga nakakita nga nag-adto sa tindahan ang iyang anak og nagtagak og sensilyo sa WiFi vendo machine alas 8:30 kagabie.
Miadto ang anak sa traysikol apan mihunong ang usa ka motorsiklo og ang sakay niini ang kalit nga namusil sa biktima. Blangko si Carlito kinsa namusil sa anak niya.
Apan aminado kini nga kanunay malambigit ang anak sa mga sinumbagay.
Nasayran na may tulo ka anak ang biktima apan bulag sa asawa nga karon nanarbaho sa abroad.
