Miangkon ang global K-Pop star nga si Sandara Park nga usahay nagmahay siya sa iyang desisyon nga biyaan ang iyang karera sa Pilipinas aron ipadayon ang iyang pangandoy nga mahimong K-Pop star sa South Korea.
Sa usa ka interbyu, giangkon ni Park nga adunay mga higayon nga makahunahuna siya nga unta wala na lang siya mibiya sa Pilipinas.
“Meron po minsan. Sana hindi na lang ako umalis,” matod ni Park.
Gibutyag usab sa singer nga sukad pa sa iyang pagkabata, dako na ang iyang pangandoy nga mahimong sikat nga artista ug andam siya nga mosulay sa mga bag-ong hagit.
Nahinumduman niya nga sa pagbisita niya kaniadto sa South Korea, nakurat siya kay walay nakaila kaniya bisan sikat na siya sa Pilipinas.
Tungod niini, nakadesisyon siyang sulayan usab ang iyang panaw sa K-Pop industry ug miapil sa training sa YG Entertainment, diin sa ulahi nahimo siyang miyembro sa sikat nga K-Pop girl group nga 2NE1.
Matod pa ni Park, basin tungod kay batan-on pa siya niadtong panahona, wala niya gihunahuna ang posibleng mahitabo sa iyang karera ug maisog lamang siyang misugal sa bag-ong oportunidad.
Bisan pa sa iyang mga pagmahay, dako gihapon ang iyang pasalamat sa mga Pinoy fans nga padayon nga nagsuporta kaniya ug nagpakita sa ilang gugma.
Giingon pa niya nga dili igo ang mga pulong aron ipahayag ang iyang pasalamat sa mga Pilipino, nga nagpabiling matinud-anon nga mga tig-suporta kaniya hangtod karon.
Misikat si Sandara Park sa Pilipinas human mahimong usa sa mga finalist sa usa ka talent search sa wala pa niya gisugdan ang iyang K-Pop career sa South Korea.
