Gipahibalo sa Office of the Civil Defense Region 12 nga magpahigayon sila og nationwide earthquake drill karong umaabot nga Hunyo 19, isip kabahin sa ika-duhang kwarter nga aktibidad sa tuig.
Matod ni OCD-12 Regional Director Reylindo Aniñon, usa kini ka functional exercise nga tumong masulayan ang katakos sa rehiyon sa pagpatuman sa Regional Disaster Response Plan kon mahitabo ang linog ug tsunami.
Kabahin kini sa dugay nang plano sa OCD nga maglunsad og mas halapad nga simulation exercise sa ika-upat nga kwarter ning tuiga, nga ipahigayon sa mga lungsod sa Lebak ug Kalamansig sa lalawigan sa Sultan Kudarat. Sa maong kalihokan, ilang tan-awon ang kahandam sa lokal nga mga otoridad ug mga komunidad sa pag-atubang sa dakong katalagman.
Gipasabot pa ni Aniñon nga importante nga matudluan ang katawhan sa hustong paagi sa pagpanalipod sa ilang kaugalingon panahon sa kalit nga linog o tsunami.
Lakip sa mga highlight sa maong drill mao ang pagpakita og mga praktis sa “duck, cover, and hold” ug pag-ila sa mga luwas nga lugar panahon sa emerhensiya.
