Gipanghimakak sa Korte Suprema nga nakadawat sila og petisyon nga nangayo og resignation ni Pang. Ferdinand Marcos Jr. Una, nikatap ang impormasyon sa social media nga nagkanayon nga dunay gisang-at nga petisyon sa korte suprema nga adunay 16 milyones ka pirma ug naghangyo nga mo-resign ang presidente.
Ang hinimo-himo nga dokumento, sumala sa SC, gipetsahan Marso 16, 2025 ug nag-ila sa Korte Suprema nga Spokesperson nga tinubdan niini.
Giinsistir sa SC nga dili tinuod ang maong dokumento ug ang tigpamaba niini wala moluwat og susamang pamahayag ug gitawag kini nnga fake news. Apan subling gipahimug-atan sa SC nga dili usab kini tinuod ug wala gitakdang mopahigayon og session ang En Banc.
Gihisgotan usab sa SC ang mga nauna nang gipakaylap nga mga taho nga migawas kaniadtong Marso 11 nga nag-ingon nga nagpagawas kini usa ka temporaryo nga restraining order (TRO) sa petisyon nga may kalabotan sa pagdakop sa kanhi presidente. Matod sa SC, kining tanang bakak nga impormasyon nagpaagi na sa tukmang aksyon.
Gipasalig sa korte nga imbestigahan silang tanan ug himoan og tukmang aksyon, apil na ang pagpahamtang og tukmang silot kon kinsa man ang responsable.
Sa laing bahin, partikular nga giila sa SC ang mga facebook account nga ‘Choose Libungan’ ug ‘Bernard Flores Maicon’ nga duha sa nagpakaylap sa maong impormasyon.
Samtang giawhag sa SC ang publiko nga mutuo lamang sa opisyal nga anunsyo niini nga gipagawas sa opisyal nga website sa Korte Suprema sa Pilipinas.
