ALABEL, SARANGANI- Gipahibalo ni Alabel Mayor Lilibeth “Ybing” Salarda nga nagpagawas kini og Executive Order nga nagdili sa pagsulod sa buhing baboy ug karne niini ngadto sa Alabel sugod Oktubre 9 isip lakang sa paglikay sa African Swine Fever o ASF.
Matod ni Salarda, tumong niini ang pagpanalipod sa lokal nga mga negosyante nga namaligya og baboy aron dili maapektuhan ang ilang panginabuhian.
Gipasabot sa mayor nga dili tugotan ang pagsulod sa buhing baboy ug mga produkto nga karne sa baboy gikan sa ubang lugar paingon sa Alabel.
Sumala niya, ipatuman ang ‘localization’ sa pagbaligya sa karne sa sulod lamang sa Alabel, diin ang mga mamalitay ug magbaligya ang mag-operate sulod sa Alabel.
Dugang pa ni Mayor Salarda, usa kini ka pag-amping aron malikayan ang posibleng pagsulod sa sakit sa mga baboy sa ilang lugar.
Sa pamahayag pa niini nga lisod usab masiguro kung walay ASF ang mga baboy ug karne nga gikan sa ubang lugar.
