GENSAN-Naglaum si Josephine Latore, School Principal sa Jose Divinagracia Sr. Elementary School, nga mahatagan og dugang sweldo ang mga magtutudlo aron matabangan sila sa ilang panginahanglan sa adlaw-adlaw nga panginabuhi.
Matod ni Latore, usa sa mga pangandoy sa mga magtutudlo mao ang ‘salary increase’ aron mapalambo ang ilang kahimtang sa kinabuhi, ilabi na kay daghan kanila ang adunay mga utang ug ‘loans’.
Apan sumala niya, hinay-hinay nang gitabangan sa Department of Education ug sa gobyerno ang mga magtutudlo pinaagi sa mga oportunidad alang sa ‘promotion’.
Gipasabot ni Latore nga gihatagan karon og higayon ang mga magtutudlo nga maka-apply alang sa ‘promotion’, basta makompleto ug mapasa nila ang gikinahanglang mga dokumento.
Gipunting usab niya nga mas gihatagan og prayoridad ang mga magtutudlo nga anaa na sa edad nga 40 hangtod 50 pataas aron makabenepisyo sa maong mga oportunidad.
Bisan pa niini, padayon gihapon ang paglaum sa mga magtutudlo nga madugangan ang ilang sweldo aron mas mapagaan ang ilang pinansyal nga kahimtang ug mapalambo ang ilang kalidad sa kinabuhi.
