GENSAN- Gipakusgan sa General Santos City Police Office ang kampanya batok sa mga driver sa tricycle nga giingong gapangbastos sa ilang mga pasahero.
Matod ni Police Colonel Ariel B. Acala,City Director sa GSCPO, mandoan niya ang Traffic Enforcement Unit-Gensan ug Motor Patrol Unit nga makig-alayon sa Public Safety Office aron dali nga mailhan ug ma-trace ang mga driver nga ireklamo sa mga pasahero.
Gihangyo usab ni Acala ang mga biktima nga moduol dayon sa labing duol nga ‘police station’ aron i-report ang insidente.
Matod pa sa hepe sa kapolisan nga kung mahimo, picturan o hinumdoman ang tricycle, ilabina ang body number ug plate number, sa dili pa mosakay.
Matod niya, importante ang maong impormasyon aron dali nga ma-trace sa Public Safety Office ang maong sakyanan ug driver kung adunay mahitabo nga insidente.
Bisan pa man kung dili makakuha og hulagway ang biktima tungod sa kahadlok o kalit nga panghitabo, igo na usab matod pa nga masulat ang body number sa tricycle isip importanteng ebidensya.
Gipasabot ni Acala nga kung adunay igo nga ebidensya ug andam ang reklamante nga mosang-at og kaso, tabangan sa kapolisan ang biktima sa pagproseso sa reklamo.
Samtang kung mopili ang reklamante nga makigsabot o dili mopadayon sa kaso, matod ni Acala, irekord gihapon sa kapolisan ang insidente ug isumite ang report sa Public Safety Office aron mahimong basehan sa posibleng administratibong silot.
