GENERAL SANTOS CITY- Dili na mukaso pa ang pamilya sa dalaga nga biktima sa drag racing hinuon magpabayad na lamang sa hospital bills.
Kini ang pahayag ni Silveria Hecto apuhan ni Kristel Mae Hecto nga nabanggaan sa drag racer nga si Christian Dave Bonayos nga taga Tacurong Sultan Kudarat.
Pagsaysay sa apuhan nga tagbuon unta sa biktima ang ig-agaw niini samtang maneho ang iyang motorsiklo apan pag-abut matud pa niini sa circumferential road nabanggaan kini nga nagresulta sa pagkalabay sa motor hinungdan nga bali bali ang kabukugan sa biktima.
Nakaagi na matud pa ang unang motor apan ang nagsunod nga motor maoy nakabangga sa iyang apo.
Panawagan niini nga mulihok na ang taga Barangay ug mga Pulis tungod nasayod ang katawhan sa Fatima nga adunay lumba halos matag gabii sa lugar.
Hangyo niini sa kapulisan nga bantayan ang lugar luyo nga duol kini sa usa ka Police outpost.
Nasuta nga dili makagawas sa hospital ang patay nga lawas ni Bonayos kung dili mupirma ang pamilya ni Kristel .
Nahibaw-an nga may tulo ka anak ang driver nga nakabangga human ma estorya sa pamilya Hecto ang igsuon sa suspek.
