Dili matago sa pamunuan sa Philippine Basketball Association (PBA) ang kasubo sa pagkalambigit sa pagpamusil ni NorthPort guard John Amores sa Lumban, Laguna.
Matod ni PBA commissioner Willie Marcial nga dili na sila maghatag og unsa mang komento tungod itugyan na lamang nila sa mga kapulisan ang maong kaso.
Dili gustong maghatag ug pahayag ni Marcial kung aduna silay ipahamtang nga silot kang Amores o hingpit nga tangtangon sa PBA.
Kini tungod nag-atubang sa kasong attempted murder si Amores tungod sa pagpamusil sa usa ka Lee Cacalda human nga makalalis niini sa dulang basketball sa Barangay Maylatang Uno, Lumban, Laguna.
Kagahapon sa buntag dihang misurender si Amroes kauban ang 20-anyos nga igsuon niini nga maoy nagmaneho sa motorsiklo.
Bisag wala naigo sa pagpamusil, desidido ang biktima nga kasuhan si Amores.
Si Amores nga kanhi player sa Jose Rizal University gipahamtangan og ban sa NCAA human nga gisumbag ang upat ka players sa De La Salle-College of St. Benilde niadtong 2022.
Bisag sa maong insidente, gikuha gihapon siya sa NorthPort Batang Pier sa fifth round sa 2023 PBA Rookie Draft.
