Mosulay pag-usab ang Filipina tennis star nga si Alexandra Eala nga makuha ang iyang unang kadaogan batok sa Czech Republic player nga si Tereza Valentova sa ilang ikatulong panag-atbang. Gikatakdang ipahigayon ang ilang dula ugma, Nobyembre 5, sa alas-6:30 sa gabii.
Sa ilang duha ka miaging panag-atbang, parehong nakadaog si Valentova. Una silang nag-atbang sa Japan Open niadtong 2025, diin gipildi sa Czech player ang Filipina pinaagi sa straight sets, 6-1, 6-2. Nagkita na usab sila sa Qatar Open sa Doha niadtong Pebrero 2026, diin midaog na usab si Valentova sa iskor nga 7-6(6), 6-1.
Bisan pa niini, mosulod si Eala sa ilang ikatulong panag-atbang nga dala ang maayong momentum human niya mapildi si Australian player Emerson Jones, 6-4, 6-3, sa opening round sa Hong Kong Open.
Samtang, gikan usab sa kadaogan si Valentova batok sa Japanese player nga si Himeno Sakatsume, 6-3, 7-5, aron makasulod sa Round of 16.
Mas taas usab ang kasamtangang ranggo ni Eala sa Women’s Tennis Association (WTA) nga anaa sa No. 17, kon itandi kang Valentova nga anaa sa No. 85.
