Duha ka kaso sa omicron variant ang natala sa Rehiyon 12 base sa labing ulahing report sa Department of Health (DOH).
Hinoon walay ensaktong detalye nga gipagawas ang maong buhatan kung asa gapuyo ang maong pasyente.
Apan una niini gikumpirma ni Mayor Vivien Yap sa Glan nga may natala nga usa ka kaso sa omicron variant sa ilang munisipyo.
Hinoon ang maong natakdan nga OFW ang wala nakauli sa Glan sa dihang nagpositibo kung asa milahos sa Pampanga og didto gi-quarantine.
Una niini gibutyag ni Ben Claudio, presidente sa General Santos City Chamber of Commerce and Industry, nga ang report nga wala pa nakasulod ang omicron variant sa dakbayan ang murag dili katuohan.
Kini gumikan may mga indikasyon na nga paspas ang pagdaghan sa kaso sa COVID sa dakbayan og adunay mga nagkasakit nga anaa lang sa balay nga wala na-test nga posible carrier sa virus.
