GENERAL SANTOS CITY – Wala’y financial obligation ang lokal nga panggamhanan sa ginaluto nga memorandum of agreement (MOA) tali sa usa ka dakong telecommunication company, kabahin sa Community Wifi Project sa GenSan.
Kini ang giklaro ni City Councilor Atty. Jose Edmar Yumang kabahin sa maong proyekto human nga na-determina na ang pito ka barangay sa dakbyan nga mamahimong prayoridad nga makaangkon ug maayong internet connection.
Nasuta nga gawas sa mga barangay nga anaa sa sentrong bahin, target usab sa maong proyekto ang mga lagyong dapit, sama sa mga barangay sa San Jose, Upper Labay ug Sinawal, asa nihit ang internet signal.
Una nang giaprubahan sa Sangguniang Panlungsod ang giduso nga resolusyon ni Kag. Yumang, kung asa gahatag og pagtugot sa LGU nga mopirma og MOA tali sa usa ka telecommunication company, alang sa maong katuyuan.
Nasayran usab nga target sa maong proyekto ang mga barangay sa Calumpang, Lagao, Bula, Labangal, City Heights, Mabuhay ug San Isidro.
